gan
Carwyn
Fyddwn i ddim yn dweud mod i’n un o’r creaduriaid mwyaf heini ar wyneb daear, ond mae cael mynd am dro hamddenol yn un o bleserau bywyd.
Pa ffordd well o fwynhau’r ardal arbennig yr ydan ni’n byw ynddi?
Dyna wnes i fore ’ma digwydd bod. Gweld fod y tywydd yn gaddo hi’n sych a chan fod gen i ddiwrnod i ffwrdd, roedd hi gystal syniad a’r un.
Bws Ogwen
Doeddwn i heb fod ar y bws trydan cymunedol Bws Ogwen o’r blaen, ond mae hi’n drefn hwylus iawn gyda gwasanaeth rheolaidd rhwng Bethesda ac ymlaen i fyny’r dyffryn ac ar adegau yn teithio i Gapel Curig.
Dwy bunt ydi tocyn unffordd i Ogwen a dyna dro braf i fyny o’r A5 am Gwm Idwal. Er bod yna ambell un arall o gwmpas, roedd hi’n ddistaw braf a chyfle i ymgolli yn y llonyddwch tawel.
Lôn Las
Wedi panad sydyn, dyna anelu nôl am Fethesda i gyfeiriad Lôn Las Ogwen.
Fawr neb yn dod i fy nghyfwr heblaw ambell ddafad nes i mi ddod nes at Fethesda.
Erbyn hynny roedd cwpl o feicwyr chwim – ond o fwrw golwg sydyn dwi’n amau fod nhw yn feiciau trydan. Syniad da i fyny’r elltydd na!
Cadwyn Ogwen
Roedd y daith ar hyd y llwybr yn ddistaw braf, a dyna gofio wrth nesáu at ardal Chwarel y Penrhyn fod gen i archeb o gynnyrch lleol yn fy nisgwyl yn Llaethdy Gwyn, lle mae caws hyfryd Cosyn Cymru yn cael ei gynhyrchu.
Felly fe es draw i nôl fy archeb Cadwyn Ogwen. Mae modd codi eich archeb o sawl lleoliad neu drefnu iddo gael ei anfon atoch. Cofiwch wneud eich archeb erbyn hanner dydd ar ddydd Mawrth er mwyn cael y cynnyrch ar ddydd Iau.
Eich hoff le i fynd am dro?
A dyna ni – beth am rannu lluniau neu eich hoff daith gerdded chi yn Nyffryn Ogwen.
Mae cyfrannu i Ogwen360yn ddigon rhwydd – rhannwch eich hoff le chi’n lleol i fynd am dro!