gan
Ohebydd Golwg360
Mae Cyngor Gwynedd yn awyddus i glywed barn trigolion y sir ynglŷn â’r cynnig i gynyddu’r Premiwm Treth Cyngor ar Ail Gartrefi ac Eiddo Gwag Hirdymor i hyd at 100% ar gyfer blwyddyn ariannol 2021/22.
Ers mis Ebrill 2018, mae Cyngor Gwynedd wedi gosod premiwm treth cyngor o 50% ar eiddo o’r fath.
Fodd bynnag, mae gwaith ymchwil a gomisiynwyd gan Gabinet y Cyngor ar reoli’r defnydd o dai fel cartrefi gwyliau yn dangos fod niferoedd yn parhau i gynyddu.
Mae Llywodraeth Cymru wedi rhoi’r grym i gynghorau i godi swm ychwanegol o hyd at 100% dros lefel safonol treth cyngor.
Bydd Cyngor Gwynedd yn penderfynu ar y polisi dros y misoedd nesaf ac maent yn awyddus i aelodau’r cyhoedd rannu eu barn ynglŷn â’r mater drwy lenwi holiadur byr.
“Tai gwyliau yn fater o argyfwng”
Yn ôl y Cynghorydd Ioan Thomas, Aelod Cabinet Cyllid Cyngor Gwynedd:
“Mae gwaith ymchwil diweddar yn dangos fod sefyllfa tai gwyliau yn fater o argyfwng a’i bod hi bron yn amhosib i lawer iawn o bobl Gwynedd gael troed ar y farchnad dai – boed hynny i brynu neu rentu cartref.
“Mewn gwirionedd, ar hyn o bryd, mae prisiau tai uchel oherwydd y galw am unedau gwyliau ac ail gartrefi yn gwthio prisiau ymhell y tu hwnt i afael pobl leol mewn llawer iawn o gymunedau Gwynedd.
“Ers Ebrill 2018, mae’r Cyngor wedi codi 50% yn ychwanegol o dreth cyngor ar berchnogion ail gartrefi a thai gwag, gyda’r arian yma yn cael ei glustnodi ar gyfer cynlluniau tai sy’n cefnogi pobl Gwynedd i gael mynediad i dai addas yn ein cymunedau..
“Rydym yn awyddus i glywed barn y cyhoedd ar y syniad o godi 100% o bremiwm ail dai ar ail gartrefi ac eiddo sydd wedi bod yn wag am gyfnod o amser.”
Mae modd rhannu eich barn fan hyn neu am gopi papur gallwch ffonio 01766 771000.
Mae’r cyfnod ymgynghori ar agor tan Chwefror 1, 2021.