gan
Ohebydd Golwg360
Mi fydd dadl etholiadol yn ardal Arfon yn digwydd heno er i ymgeisydd Plaid Brexit anwybyddu gwahoddiad i gymryd rhan.
Yn ôl Harry Riley, Is Lywydd Addysg Undeb Myfyrwyr Bangor, fe gafodd yr ymgeiswyr i gyd eu gwahodd i’r ddadl sydd yn cael ei chynnal yng Nghanolfan Pontio ym Mangor dan adain yr Undeb.
Mae disgwyl i ymgeiswyr y Ceidwadwyr, Plaid Cymru a Llafur fod yno ac mae’r Undeb yn dweud bod croeso o hyd i i Garry Gribben o Blaid Brexit.
Daw hyn wythnos wedi i Neuadd Ogwen ym Methesda orfod canslo dadl debyg oherwydd diffyg cynrychiolaeth o’r pleidiau – er fod Hywel Williams o Blaid Cymru a Steffie Williams Roberts o’r blaid Lafur wedi cytuno i gymryd rhan.
Mewn datganiad ar gyfryngau cymdeithasol dywedodd Neuadd Ogwen fod ymgeiswyr Y Ceidwadwyr a Phlaid Brexit unai heb ateb, neu wedi gwrthod y cynnig i fod yn rhan o’r ddadl.
Mi fydd y ddadl etholiadol yn Pontio yn mynd yn ei flaen heno am 6:30yh.
Ymgeiswyr Arfon:
- Gonul Daniels, Ceidwadwyr
- Gary Gribben, Plaid Brexit
- Hywel Williams, Plaid Cymru
- Steffie Williams Roberts, Llafur