Taith Tractors yn codi arian at Sioe Dyffryn Ogwen

Mae taith tractors arbennig yn cael ei chynnal fis Rhagfyr, gyda’r elw yn mynd tuag at Sioe Dyffryn Ogwen.

Bydd y Daith Tractors yn cychwyn a gorffen yng Nghlwb Rygbi Bethesda, gyda’r daith yn mynd o amgylch pentrefi Dyffryn Ogwen, felly bydd cyfle i bawb fod allan i gefnogi’r daith a chyfrannu at y sioe.

“Y prif reswm dros gynnal y daith ydi i godi arian at Sioe Amaethyddol Dyffryn Ogwen, ond hefyd i gynnig rhywbeth gwahanol i drigolion yr ardal cyn y Nadolig. Hyd y gwn i does na ddim o’i fath wedi bod yn Nyffryn Ogwen,” meddai un o’r trefnwyr Elin Rhys.

“Mi ydan ni eisiau annog unigolion i gofrestru fel ein bod a syniad o ran niferoedd i allu cynllunio. Mae yna lot o ddiddordeb, ond mae’n bwysig fod unrhyw un sydd am gymryd rhan yn cofrestru o flaen llaw er mwyn i ni allu cynllunio.”

Cost cymryd rhan fydd £20 y tractor, a fydd yn cynnwys tocyn bwyd, gyda £5 ychwanegol ar gyfer pob teithiwr. Bydd rhaid i bob teithiwr tractor fod yn 13 oed neu’n hŷn, ac mae angen cofrestru’r tractors o flaen llaw.

I roi gwybod os ydych yn bwriadu bod yn rhan, e-bostiwch y trefnwyr ar heddacelin@yahoo.co.uk neu ffonio Hedd Rhys ar 07765860643 neu Elin Rhys ar 07747018421.