gan
Carwyn
Dr Robert Havard Davies (llun o wefan y Bwrdd Iechyd)
Derbyniodd Dr Robert Havard Davies, Tregarth (ail o’r dde) fedal Ymerodraeth Brydeinig, gan yr Arglwydd Raglaw Edmund S Bailey, mewn seremoni yng Nghastell Caernarfon yn ddiweddar.
Yn y flwyddyn y dechreuodd Dr Robert Davies weithio fel meddyg ymgynghorol pediatrig, roedd galwyn o betrol yn 50c, peint o laeth yn 4.5c a pheint o gwrw yn 22.5c.
Enillodd Gorllewin yr Almaen Gwpan y Byd, cafodd Arlywydd yr Unol Daleithiau Richard Nixon ei ddal yng nghanol sgandal Watergate a disodlwyd Edward Heath fel Prif Weinidog y DU gan Harold Wilson – mae 1974 yn teimlo fel byd gwahanol.
Dyna pryd y dechreuodd Dr Robert Davies ar ei yrfa fel meddyg ymgynghorol pediatrig, ac mae bellach wedi ei gydnabod am oes o wasanaeth i’r maes iechyd.
Roedd ei ymrwymiad i sicrhau bod pobl ifanc yn derbyn gofal yn ymestyn y tu hwnt i ymddeoliad, pan benderfynodd ddod yn ôl fel meddyg ymgynghorol locwm a gweithio mewn clinig adolygu meddyginiaeth ar gyfer plant ag ADHD ac awtistiaeth ddifrifol.
Am ei wasanaeth i’r gwasanaeth iechyd, dros hanner canrif, mae Dr Robert Davies o Dregarth, yn derbyn Medal yr Ymerodraeth Brydeinig. Roedd yn un o lond llaw o ardal Gwynedd a Môn i dderbyn medal o’r fath mewn seremoni yng Nghastell Caernarfon yn ddiweddar.
Ar ôl derbyn ei wobr, dywedodd Robert: “Rwyf wedi fy synnu. Mae hynny’n crynhoi fy nheimladau mwy neu lai.”
Dechreuodd Robert, 82 oed, ei yrfa yn Ysbyty Dewi Sant ym Mangor sydd bellach wedi’i ddymchwel a hyd at 1995 bu’n gweithio yn yr uned gofal arbennig i fabanod.
Symudodd wedyn i faes pediatreg gymunedol ond parhaodd i weithio ym maes pediatreg gyffredinol ar-alwad yn Ysbyty Gwynedd ar benwythnosau.
Roedd tad Robert yn seiciatrydd ymgynghorol ac mae un o’i feibion yn baediatregydd ymgynghorol yn Ysbyty Athrofaol Cymru yng Nghaerdydd.
Wrth ofyn pam ei fod yn parhau i weithio, dywedodd Robert: “Rwy’n mwynhau fy ngwaith, rwy’n mwynhau gweld cleifion a’u teuluoedd.
“Rwy’n hoffi’r her dechnegol ac, wrth gwrs, eu helpu.”