gan
Iwan Huw Roberts
Ydych chi wedi clywed am y gwefan Dewis Cymru? www.dewis.cymru
Os na, gwefan yw ‘Dewis’ sydd wedi ei chreu i ganolbwyntio ar lesiant personol, drwy rannu gwybodaeth, cyngor a gwasanaethau. Mae wedi ei baratoi yn bwrpasol gan Lywodraeth Cymru yn dilyn Deddf Gwasanaethau Cymdeithasol a Llesiant Cymru.
Mae Cyngor Gwynedd wedi cefnogi ‘Dewis’ ar hyd y blynyddoedd ond bellach mae prosiect newydd i geisio hyrwyddo ac ehangu’r defnydd ohono ym mhellach, a hynny gan y Cyngor a’r gymuned ehangach. Credwn y gall ‘Dewis’ gynorthwyo unigolion i ddarganfod cymorth a chefnogaeth, ac felly mae’n hynod bwysig fod pawb yn ymwybodol o’r wefan arbennig hon.
Yn bresennol mae nifer o wasanaethau a gwybodaeth statudol ar ‘Dewis’ a hoffem eu hyrwyddo ond law yn llaw hoffem ganolbwyntio ar gynyddu’r wybodaeth sydd yno. Hoffem weld grwpiau cymunedol a grwpiau trydydd sector yn mewnbynnu gwybodaeth, digwyddiadau a mwy. Dyma ble rydym eisiau eich cymorth chi!
Os ydych yn rhan o glwb, dosbarth neu yn trefnu digwyddiad sydd yn digwydd yn rheolaidd, rhannwch y wybodaeth. Gall y rhain fod yn llu o ddigwyddiadau gwahanol o gorau i Ferched y Wawr ac o gwis tafarn i wersi jiwdo.
Mae Cyngor Gwynedd a Dewis Cymru yno i’ch cynorthwyo i hyrwyddo’r sesiynau. Mae ‘Dewis’ yn wefan hawdd i’w defnyddio ac yn well na dim, yn rhad ac am ddim! Felly, beth amdani? Ewch i ychwanegu eich adnodd drwy ymweld â’r wefan, cofrestru ac yna clicio ‘rheoli eich adnoddau’.
Os dymunwch gymorth i fewnfwydo’r wybodaeth anfonwch eich manylion cyswllt i dewis@gwynedd.llyw.cymru, ac fe gysylltwn â chi cyn gynted ag sydd phosib er mwyn eich cynorthwyo. Os yw mynediad at gyfrifiadur yn broblemus, gall Llyfrgell Bangor gamu i’r adwy. Yno fe ddewch o hyd i gyfrifiaduron a gall y llyfrgellydd eich cynorthwyo pe byddai angen.
Yn y cyfamser, beth am chwilio am ddigwyddiadau lleol yn eich ardal chi? Ewch am gip ar Dewis.cymru, nodwch eich cod post a buan daw rhestr o ddigwyddiadau ar eich sgrin. Cofiwch alw heibio’r wefan yn rheolaidd dros y misoedd nesaf, fel y gallwch brofi’r wefan yn tyfu a chryfhau gyda bwrlwm o wasanaethau, grwpiau a digwyddiadau!
Pe dymunwch gysylltu gyda chwestiwn, sylwad neu gais mae croeso i chi e-bostio’r cyfeiriad dewis@gwynedd.llyw.cymru. Gyda’n gilydd gallwn roi ‘Dewis’ i bawb.