Mae mam František ‘Frankie’ Morris, sy’n ei arddegau sydd ar goll, wedi pledio o’r galon i unrhyw un a allai fod â gwybodaeth am ei leoliad, i ddod ymlaen.
Cafodd Frankie, sy’n dod o Landegfan ar Ynys Môn, ei weld diwethaf ger y dafarn ym Mhentir am 1:12pm ddydd Sul, 2 Mai.
Allan o gymeriad
Dywedodd ei Fam, Alice Morris: “Mae bellach wedi bod ar goll ers 27 diwrnod ac mae’n gwbl allan o gymeriad iddo fod i ffwrdd am unrhyw gyfnod heb gysylltu â rhywun.
“Rwy’n arswydo bod rhywun wedi niweidio fy mab hardd ond rwy’n sylweddoli, ar ôl cyfnod mor hir, fod posibilrwydd nad yw’n fyw mwyach.
“Helpwch fi i ddod o hyd iddo drwy roi unrhyw wybodaeth sydd gennych i’r heddlu.
“Hoffwn ddiolch i bawb sydd wedi cynnig gwybodaeth neu wedi cefnogi neu ymuno â’r chwiliad am Frankie, mae gennych fy niolch o’r galon.”
Pedair wythnos ers i Frankie gael ei weld
Ychwanegodd Ditectif Brif Arolygydd Lee Boycott o Heddlu Gogledd Cymru: “Mae pedair wythnos bellach ers i Frankie gael ei weld diwethaf ac rydym yn parhau i apelio ar unrhyw un a allai fod â gwybodaeth i ddod ymlaen.
“Mae’n ddealladwy bod teulu Frankie yn ofidus iawn, ac rwy’n parhau i apelio ar unrhyw un sydd ag unrhyw wybodaeth o gwbl i siarad â ni. Waeth pa mor ddibwys yr ydych yn meddwl yw’r wybodaeth, efallai mai dyma fydd y darn rydyn ni’n chwilio amdano, gwnewch yr alwad honno er mwyn Frankie a’i deulu.
“Mae’r ymchwiliad i ddod o hyd i Frankie yn parhau ac mae swyddogion yn ddiolchgar am y wybodaeth a dderbyniwyd hyd yn hyn.
“Os oes gennych unrhyw wybodaeth a allai fod o gymorth, cysylltwch â’r tîm ymchwilio yn uniongyrchol yma https://mipp.police.uk/operation/60NWP19A03-PO1“